அமெரிக்காவின் முன்னணி தொழில்நுட்ப நிறுவனமான என்விடியா, தங்கள் தலைமைச் செயல் அதிகாரி ஜென்சன் ஹுவாங் சீன உளவாளி எனச் சந்தேகிக்கப்படும் நபருடன் தொடர்பில் இருந்ததாக வெளியான செய்திகளைத் தொடர்ந்து சுயாதீன விசாரணையைத் தொடங்கியுள்ளது.

உலகின் மிக மதிப்புமிக்க நிறுவனங்களில் ஒன்றான என்விடியா, நிறுவனத்தின் ரகசியங்களோ அல்லது தேசியப் பாதுகாப்போ பாதிக்கப்பட்டதாகக் கருதுவதற்கு அதன் இயக்குநர் குழுவிடம் எந்தக் காரணமும் இல்லை என்று தெரிவித்துள்ளது.

நிறுவனத்தைத் தொடர்ந்து வழிநடத்துவதில் அதன் தலைமைச் செயல் அதிகாரி உறுதியாக இருப்பதாகவும் கூறியுள்ளது.

இதற்கிடையில், தனது மனைவிக்கு "துரோகம் செய்துவிட்டதாக" ஒப்புக்கொண்ட ஜென்சன் ஹுவாங், தனது மனைவி மற்றும் குழந்தைகளைப் புண்படுத்தியதற்காக மன்னிப்புக் கோரியுள்ளார்.

ஜென்சன் ஹுவாங்குடன் நெருங்கிய தொடர்பில் இருந்த சீனத் தொழிலதிபர் ஆலிஸ் ஹுவாங், சீனாவுக்காக உளவு பார்த்ததாக அமெரிக்க உளவுத்துறை அதிகாரிகள் நம்பியதாக நியூயார்க் டைம்ஸ் வெளியிட்ட செய்தியில் தெரிவிக்கப்பட்டுள்ளது.

தான் செய்த செயல்களுக்கு "முழுப் பொறுப்பையும்" ஏற்றுக்கொள்வதாக ஜென்சன் ஹுவாங் தெரிவித்தார். என்விடியா நிறுவனத்தின் ஊழியர்கள், இயக்குநர்கள் குழு மற்றும் பங்குதாரர்களிடம் தனது பொறுப்புகளைச் சரியாக நிறைவேற்றத் தவறிவிட்டதாகவும் அவர் குறிப்பிட்டார்.

உலகின் மிகப்பெரிய நிறுவனங்களில் ஒன்றான என்விடியா, வளர்ந்து வரும் செயற்கை நுண்ணறிவுத் தொழில்நுட்பங்களுக்குத் தேவையான வன்பொருள்களைத் தயாரிப்பதில் முக்கியப் பங்கு வகிக்கிறது.

ஜென்சன் ஹுவாங் 30 ஆண்டுகளுக்கும் மேலாக இந்நிறுவனத்தின் தலைமைப் பொறுப்பில் இருந்து வருகிறார்.

"நான் எனது மனைவிக்குத் துரோகம் செய்துவிட்டேன். எனது செயல்கள் அவரையும் எங்கள் குழந்தைகளையும் காயப்படுத்தியுள்ளன. நான் செய்த செயலுக்கு எந்தவிதமான நியாயமும் கற்பிக்க முடியாது. இதற்காக நான் ஆழ்ந்த வருத்தம் தெரிவிக்கிறேன்" என்று அவர் கூறியுள்ளார்.

"செய்திகளில் எழுப்பப்பட்ட தேசியப் பாதுகாப்பு தொடர்பான கவலைகள் குறித்து, என்விடியா இயக்குநர் குழு சுதந்திரமான விசாரணையைத் தொடங்கியுள்ளது. இந்த விசாரணையை நான் ஆதரிக்கிறேன். அதற்கு முழுமையாக ஒத்துழைப்பேன்."

"நான் நமது நாட்டையும் எங்கள் நிறுவனத்தையும் நேசிக்கிறேன். என்விடியாவைப் பாதுகாப்பதிலும் அமெரிக்காவின் தேசியப் பாதுகாப்புக்கு ஆதரவளிப்பதிலும் உறுதியாக இருக்கிறேன். ஓர் அமெரிக்கராக இருப்பதில் பெருமையும் நன்றியுணர்வும் கொள்கிறேன்" என்று தெரிவித்துள்ளார்.

என்விடியாவின் இயக்குநர்கள் குழு தனியாக வெளியிட்ட அறிக்கையில், "நிறுவனத்தின் நிறுவனர் மற்றும் தலைமைச் செயல் அதிகாரி ஜென்சன் ஹுவாங் வெளிநாட்டு உளவுத்துறை நடவடிக்கையின் இலக்காக இருந்ததாக அண்மையில் வெளியான செய்திகளைக் கருத்தில் கொண்டு" விசாரணையைத் தொடங்க உள்ளதாகத் தெரிவிக்கப்பட்டுள்ளது.

மேலும், "என்விடியா மற்றும் அதன் பங்குதாரர்களின் நலன்களுக்கு மிக முக்கியமானதான அமெரிக்காவின் தேசிய மற்றும் பொருளாதாரப் பாதுகாப்பிற்கு இயக்குநர்கள் குழு முன்னுரிமை அளிக்கிறது"என்றும் குறிப்பிடப்பட்டுள்ளது.

"தேசியப் பாதுகாப்புக்கோ அல்லது என்விடியாவின் ரகசியங்களுக்கோ பாதிப்பு ஏற்பட்டதாக நம்புவதற்கு இயக்குநர்கள் குழுவிடம் எந்தக் காரணமும் இல்லை. இருப்பினும், கிடைக்கக்கூடிய அனைத்துத் தகவல்களையும் இந்த விசாரணை ஆராயும்" என்று குறிப்பிடப்பட்டுள்ளது.

டிரம்ப் கூறியது என்ன?

விசாரணை குறித்த செய்திகள் வெளியானதிலிருந்து என்விடியா தலைமைச் செயல் அதிகாரியுடன் தான் பேசவில்லை என்று அமெரிக்க அதிபர் டொனால்ட் டிரம்ப் தெரிவித்துள்ளார்.

"அவர் ஒரு சிறந்த மனிதர் என்பது மட்டுமே எனக்குத் தெரியும். ஆனால், என்ன நடக்கிறது என்பது உங்களுக்குத் தெரியாது" என்று செய்தியாளர்களிடம் தெரிவித்த டிரம்ப், அவர் "நமது நாட்டிற்காக வியக்கத்தக்க வகையில் பணியாற்றியுள்ளார்" என்றும் குறிப்பிட்டார்.

கடந்த ஆண்டு, சீனாவுக்காக உளவு பார்த்ததாகக் கூறப்படும் ஆலிஸ் ஹுவாங் குறித்த உளவுத்துறை தகவல்கள் டிரம்பிடம் தெரிவிக்கப்பட்டதாக அக்டோபர் மாத இறுதியில் நியூயார்க் டைம்ஸ் செய்தி வெளியிட்டிருந்தது.

அப்போது கிடைத்த உளவுத்துறை தகவல்களின் அடிப்படையில் டிரம்ப் நடவடிக்கை எடுத்திருக்க வேண்டுமா என்று ஞாயிற்றுக்கிழமை செய்தியாளர்கள் கேட்டனர்.

அதற்கு அவர், "இல்லை, அப்படி நான் நினைக்கவில்லை. அவர் ஒரு நேர்மையான மனிதர் என்று கருதுகிறேன்" என்று பதிலளித்தார்.

என்விடியா தலைவரைக் குறிவைத்து உளவு பார்க்கும் நடவடிக்கை நடைபெற்றதாகக் கூறப்படும் குற்றச்சாட்டுகளைச் சீனா ஏற்கெனவே நிராகரித்துள்ளது. இந்தக் கூற்றுகளை "ஆதாரமற்ற ஊகங்கள்" என்றும் சீனா வர்ணித்துள்ளது.

ஜென்சன் ஹுவாங், என்விடியா நிறுவனம் திவாலாகும் நிலைக்குச் சென்றபோது ஒன்றுக்கு மேற்பட்ட முறை அதைக் காப்பாற்றியுள்ளார்.

உலகின் பிற பகுதிகள் செயற்கை நுண்ணறிவின் முக்கியத்துவத்தை உணர்வதற்கு நீண்ட காலத்துக்கு முன்பே, அதில் அவர் முதலீடு செய்து ஆபத்துகளை எதிர்கொண்டார்.

முதலில் கேமிங் பயன்பாட்டிற்காக வடிவமைக்கப்பட்ட என்விடியா சிப்களை, செயற்கை நுண்ணறிவு மேம்பாட்டுக்கான சிறந்த சிப்களாக மாற்ற அவர் எடுத்த முடிவு தற்போது மிகப்பெரிய பலனை அளித்துள்ளது.

இதன் மூலம் அந்த நிறுவனம் டிரில்லியன் கணக்கான டாலர்கள் மதிப்பைக் கொண்ட நிறுவனமாக உயர்ந்துள்ளது.

பணிக்கு அதிக முக்கியத்துவம் அளிப்பவர், முழுமையான தரத்தை எதிர்பார்ப்பவர் மற்றும் தனது ஊழியர்களிடமிருந்து மிக உயர்ந்த தரத்திலான பணியை எதிர்பார்ப்பவர் எனப் பெயர்பெற்ற ஜென்சன் ஹுவாங்குக்கு இது மிகப்பெரிய பின்னடைவாகும்.

ஆலிஸ் ஹுவாங், சிங்கப்பூரைத் தளமாகக் கொண்டு செயல்படும் தரவு மைய நிறுவனமான மெகாஸ்பீடுடன் தொடர்புடையவர்.

கடந்த மாதம் நியூயார்க் டைம்ஸ் நாளிதழிடம் பேசிய அந்த நிறுவனம், தற்போதைய நிர்வாகம் இந்தக் குற்றச்சாட்டுகளைத் தீவிரமாக எடுத்துக்கொண்டுள்ளதாகவும், உள்நிலை விசாரணை நடத்துவதற்காக வெளிப்புறச் சட்ட ஆலோசகர்களை நியமித்துள்ளதாகவும் தெரிவித்தது.

செயற்கை நுண்ணறிவுக்கான உள்கட்டமைப்பில் என்விடியா முக்கியப் பங்கு வகிக்கிறது. ஓபன்ஏஐ மற்றும் மெட்டா உள்ளிட்ட முன்னணி செயற்கை நுண்ணறிவு மாதிரிகளை உருவாக்கும் நிறுவனங்களுக்கு அது சிப்களை வழங்குகிறது.

இந்த மைக்ரோசிப் தயாரிப்பு நிறுவனத்தின் மதிப்பு சுமார் 4.5 டிரில்லியன் டாலராக உள்ளது. இதன் மூலம் அதிக மதிப்புமிக்க நிறுவனங்களில் ஒன்றாக என்விடியா திகழ்கிறது.

நியூயார்க் டைம்ஸ் மேற்கோள் காட்டிய பெயர் குறிப்பிடப்படாத வட்டாரங்களின்படி, அமெரிக்க உளவுத்துறை அமைப்புகள் ஆலிஸ் ஹுவாங்கைக் கண்காணித்து வந்தன. அவர் சீன அரசின் சார்பாகச் செயல்பட்டு வந்ததாக அவை முடிவு செய்திருந்தன.

கண்காணிப்பின்போது ஆலிஸ் ஹுவாங்குக்கும் ஓர் அமெரிக்கக் குடிமகனுக்கும் இடையே தகவல் தொடர்பு இருந்தது தெரியவந்ததாகக் கூறப்படுகிறது.

பின்னர், 'அன்மாஸ்கிங்' எனப்படும் நடைமுறையின் மூலம் அந்த அமெரிக்கக் குடிமகன் ஜென்சன் ஹுவாங் என்பது அடையாளம் காணப்பட்டது.

ஹுவாங் லே என்றும் அழைக்கப்படும் ஆலிஸ் ஹுவாங், சீனாவுக்கு என்ன மாதிரியான தகவல்களை வழங்கியதாகக் குற்றம்சாட்டப்படுகிறது, அந்தத் தகவல்கள் எந்த அளவுக்கு மதிப்புமிக்கவை அல்லது அவர் எப்போது உளவுத் தகவல்களைச் சேகரிக்கத் தொடங்கினார் என்று நம்பப்படுகிறது என்பது இன்னும் தெளிவாகத் தெரியவில்லை.

இதுகுறித்து கருத்து தெரிவிக்குமாறு நியூயார்க் டைம்ஸ் விடுத்த கோரிக்கைக்கு ஆலிஸ் ஹுவாங் பதிலளிக்கவில்லை.

கடந்த வாரம், இந்த உறவு குறித்த செய்திகள் வெளியானதைத் தொடர்ந்து, நாடாளுமன்ற உறுப்பினர்கள் ஜென்சன் ஹுவாங்குக்குக் கடிதம் எழுதி, தங்கள் முன்னிலையில் ஆஜராகுமாறு கேட்டுக்கொண்டனர்.

ஆலிஸ் ஹுவாங்குடனான அவரது தொடர்பு குறித்த செய்திகள் வெளியாகியுள்ள நிலையில், வெளிநாட்டு எதிரி நாடுகளின் உளவு நடவடிக்கைகளுக்கு எதிரான என்விடியாவின் "பாதுகாப்பு நெறிமுறைகள்" குறித்து விவாதிப்பதற்காக, இந்த மாதத்தின் பிற்பகுதியில் தங்கள் முன்னிலையில் ஆஜராகுமாறு பிரதிநிதிகள் சபையின் குடியரசுக் கட்சியைச் சேர்ந்த மூன்று குழுத் தலைவர்கள் அதன் தலைமைச் செயல் அதிகாரியைக் கேட்டுக்கொண்டனர்.

"சமீபத்திய செய்திகள், முக்கியத்துவம் வாய்ந்த அமெரிக்கத் தொழில்நுட்பம் மற்றும் தகவல்களைச் சீனா அணுகுவது தொடர்பாகத் தேசியப் பாதுகாப்புக் கவலைகளை எழுப்புகின்றன.''என்று அந்தக் கடிதத்தில் குறிப்பிடப்பட்டிருந்தது.

அமெரிக்காவுக்கும் சீனாவுக்கும் இடையிலான போட்டியில் என்விடியாவின் செயற்கை நுண்ணறிவுச் சிப்கள் முக்கிய கவனத்தைப் பெற்றுள்ளன.

மேலும், அதன் மேம்பட்ட தயாரிப்புகளை எந்தெந்த இடங்களில் விற்பனை செய்யலாம் என்பதற்கும் அமெரிக்கா ஏற்கெனவே கட்டுப்பாடுகளை விதித்துள்ளது.

என்விடியாவின் இரண்டாவது அதிநவீன குறைக்கடத்தியான ஹெச்200 சிப், சீனாவின் தொழில்நுட்பத் துறைக்கு அமெரிக்காவை விட முன்னிலை அளித்துவிடும் என்ற கவலை காரணமாக, அமெரிக்காவால் ஏற்கெனவே விற்பனைக்குக் கட்டுப்படுத்தப்பட்டிருந்தது.

ஜனவரி மாதம், குறிப்பிட்ட நிபந்தனைகளின் கீழ் சீன வாடிக்கையாளர்களுக்கு ஹெச்200 சிப்களை விற்பனை செய்ய நிறுவனத்தை அனுமதிப்பதாக டிரம்ப் நிர்வாகம் தெரிவித்தது.

- இது, பிபிசிக்காக கலெக்டிவ் நியூஸ்ரூம் வெளியீடு