"எனது நுட்பத்தை மாற்றுவதற்குப் பதிலாக, சரியான நிலை மற்றும் பேட்டிங் பொசிஷனில் கவனம் செலுத்தினேன். சூழ்நிலைக்கு ஏற்ப என்னைத் தகவமைத்துக் கொள்ள உதவும் ஒரு பொசிஷனை நான் தேடினேன்" என்று இந்திய கிரிக்கெட் வீரர் கே.எல்.ராகுல் கூறினார்.
வெலிங்டனில் இந்தியா – நியூசிலாந்து அணிகளுக்கு இடையிலான முதல் டெஸ்ட் போட்டியில் கே.எல்.ராகுல் 136 ரன்கள் எடுத்து அணிக்கு முக்கியப் பங்களிப்பை வழங்கினார். நான்கு நாள் முடிவடைந்துள்ள நிலையில் இந்தியா 720 ரன் குவித்து வலுவான நிலையை எட்டியுள்ளது. லோகேஷ் ராகுலைத் தொடர்ந்து ரிஷப் பந்தும் சதம் விளாசினார். ஜெய்ஸ்வால், தேவ்தத் படிக்கல், சுப்மன் கில், துருவ் ஜூரெல் ஆகியோர் அரைசதம் கண்டனர்.
முதல் இன்னிங்சில் 368 ரன் சேர்த்திருந்த நியூசிலாந்து அணி 352 ரன் பின்தங்கியிருந்த நிலையில் இரண்டாவது இன்னிங்சை தொடங்கியது. நான்காவது நாள் ஆட்ட நேர முடிவில் அந்த அணி 2 விக்கெட் இழப்பிற்கு 119 ரன் சேர்த்திருந்தது. இன்னும் ஒரு நாள் மட்டுமே எஞ்சியுள்ள நிலையில் நியூசிலாந்து அணி இந்தியாவைக் காட்டிலும் 233 ரன்கள் பின்தங்கியுள்ளது. நாளை எஞ்சிய 8 விக்கெட்டுகளையும் வீழ்த்தி இந்தியா வெற்றி பெறுமா என்று இந்திய ரசிகர்கள் எதிர்பார்க்கின்றனர்.
இந்த டெஸ்டில் அடித்த சதத்தின் மூலம் நியூசிலாந்து, இங்கிலாந்து, ஆஸ்திரேலியா மற்றும் தென்னாப்பிரிக்கா ஆகிய நான்கு நாடுகளிலும் டெஸ்ட் போட்டிகளில் சதமடித்த முதல் இந்திய தொடக்க ஆட்டக்காரர் என்ற பெருமையை ராகுல் பெற்றார்.
தொடக்க ஆட்டக்காரராக களமிறங்கிய அவர், 290 பந்துகளை எதிர்கொண்டு 9 பவுண்டரிகள், 2 சிக்ஸர்கள் உட்பட 136 ரன்கள் எடுத்தார்.
கே.எல்.ராகுலின் ஃபார்ம் குறித்து எப்போதுமே பல்வேறு சந்தேகங்கள் எழுந்து வந்துள்ளன. ஆனால், தற்போது அதே ராகுல் தொடர்ந்து ரன்களைக் குவித்து வருகிறார். அவரிடம் ஏற்பட்டுள்ள மாற்றம் என்ன?
இந்த ஆண்டு டெஸ்ட் போட்டிகளில் 70-க்கும் அதிகமான பேட்டிங் சராசரி
கிரிக்இன்ஃபோ தரவுகளின்படி, 2022ஆம் ஆண்டில் கே.எல்.ராகுலின் டெஸ்ட் பேட்டிங் சராசரி சுமார் 17 ஆக இருந்தது. 2023ஆம் ஆண்டில் இது சுமார் 28 ஆக அதிகரித்தது. 2024ஆம் ஆண்டில் அவரது சராசரி சுமார் 35 ஆக இருந்தது.
2025ஆம் ஆண்டில் ஆஸ்திரேலியா மற்றும் இங்கிலாந்து நாடுகளில் நடைபெற்ற டெஸ்ட் தொடர்களில் அவர் விளையாடினார். இந்தச் சுற்றுப்பயணங்களிலும் அவரது பேட்டிங் சராசரி 45.16 ஆக இருந்தது.
ஆனால், 2026ஆம் ஆண்டில் இதுவரை நான்கு டெஸ்ட் போட்டிகளில் விளையாடியுள்ள ராகுல், 74.20 என்ற சராசரியுடன் ரன்களைக் குவித்துள்ளார். இந்த ஆண்டில் இரண்டு சதங்களையும் அவர் அடித்துள்ளார்.
கடந்த இரண்டு ஆண்டுகளில் டெஸ்ட் பேட்டிங் சராசரியை உயர்த்துவதற்கு என்னென்ன மாற்றங்களைச் செய்தீர்கள் என்று செய்தியாளர் சந்திப்பில் கேட்கப்பட்டபோது, "அதிக ரன்கள் எடுப்பதுதான் விஷயம்" என்று சுருக்கமாகப் பதிலளித்தார் ராகுல்.
"உண்மையை சொல்ல வேண்டுமென்றால், என்னிடம் பெரிய அளவில் எந்த மாற்றமும் ஏற்படவில்லை என்று நினைக்கிறேன். டெஸ்ட் போட்டிக்கான அறிமுக தொப்பியைப் பெற்ற காலத்திலிருந்தே ஒரே மாதிரியாகத்தான் பயிற்சி செய்து வருகிறேன். அப்போதும் இப்போதும் ஒரே அளவுக்கு கடினமாக உழைக்கிறேன். ஆனால், முன்பு என்னால் ரன்கள் எடுக்க முடியவில்லை.
"எனது பேட்டிங் நுட்பத்தில் எந்தப் பிரச்னையும் இருப்பதாக நான் நினைக்கவில்லை. ஆனால், ஆட்டத்தைப் பார்க்கும் மற்றும் புரிந்துகொள்ளும் விதம் காலப்போக்கில் மாறியுள்ளது. அதிகமாக விளையாடும் போது நமது தவறுகளை நாமே அடையாளம் காணத் தொடங்குகிறோம். எங்கு, எப்படி முன்னேற வேண்டும் என்பதையும் புரிந்துகொள்கிறோம். இவை அனைத்தும் அனுபவத்தின் மூலம் கிடைப்பவை" என்றார் ராகுல்.
மூத்த விளையாட்டுச் செய்தியாளர் நீரு பாட்டியாவும் ராகுலின் ஆட்டத்தைப் பாராட்டியுள்ளார்.
தென்னாப்பிரிக்கா, இங்கிலாந்து, நியூசிலாந்து, ஆஸ்திரேலியா ஆகிய நான்கு நாடுகளிலும் ராகுல் டெஸ்ட் சதங்களை அடித்துள்ளார். இதிலிருந்தே அவரது பேட்டிங் நுட்பம் ஒருபோதும் மோசமாக இருந்ததில்லை என்பது தெரிகிறது என்று அவர் குறிப்பிட்டார்.
வெளிநாட்டு மண்ணில் சதமடிப்பது எளிதான காரியமல்ல. ராகுல் அதைச் செய்து காட்டியுள்ளார்.
'பந்துகளை அடிக்காமல் விடும் பழக்கத்தை ஏற்படுத்திக் கொண்டேன்'
அதே செய்தியாளர் சந்திப்பில் பேசிய ராகுல், "நான் இங்கு நீண்ட காலமாக இருக்கிறேன். நீண்ட காலமாக வலைப்பயிற்சியிலும் ஈடுபட்டு வருகிறேன். துரதிர்ஷ்டவசமாக, இந்தியா ஏ அணிக்காக விளையாடிய போது என்னால் அதிக ரன்கள் எடுக்க முடியவில்லை" என்றார்.
இந்த இன்னிங்ஸில் 290 பந்துகளை எதிர்கொண்ட ராகுல், அவற்றில் பாதிக்கும் மேற்பட்ட பந்துகளை அடிக்காமல் விட்டார்.
பந்துகளை அடிக்காமல் விட்டுவிடும் பழக்கம் தனக்குப் பெரிதும் உதவியுள்ளதாக ராகுல் கூறினார்.
"சுமார் 15 மாதங்கள் மிடில் ஆர்டரில் பேட்டிங் செய்யும் பொறுப்பு எனக்கு வழங்கப்பட்டது. அந்தக் காலகட்டத்தில் ஒவ்வொரு பந்தையும் அடிக்க வேண்டும் என்ற பழக்கம் எனக்கு ஏற்பட்டது. ஆனால், பந்து நன்றாக திரும்பக்கூடிய மற்றும் வேகப்பந்துவீச்சுக்கு ஒத்துழைக்கக்கூடிய சூழல்களில் இந்த பழக்கம் ஆபத்தானது. "
"எனது பேட்டிங் நுட்பத்தில் குறை இருப்பதாக நான் ஒருபோதும் நினைத்ததில்லை. ஆனால், பந்து ஸ்விங் ஆகும்போது, பந்துக்கும் பேட்டுக்கும் இடையில் தொடர்பு ஏற்படாமல் இருப்பதை உறுதி செய்வது நல்லது" என்றார்.
பேட்டிங் நுட்பத்தில் ஏற்பட்ட முன்னேற்றம்
மூத்த விளையாட்டுச் செய்தியாளர் சஞ்சய் கிஷோர் கூறுகையில், ராகுல் தனது பேட்டிங் நுட்பத்தை மட்டுமின்றி மனதளவிலும் தன்னை வலுப்படுத்திக் கொண்டுள்ளார் என்றார்.
"ராகுலின் ஆட்டத்தில் ஏற்பட்டுள்ள மிகப்பெரிய மாற்றம், அவர் களத்தில் நிற்கும் விதத்தில்தான் தெரிகிறது. முன்பக்கக் காலின் நிலைப்பாட்டில் ராகுல் அதிக கவனம் செலுத்தியுள்ளார். தற்போது அவரது பேட்டிங் நிலைப்பாடு சற்று திறந்த நிலையில் உள்ளது. இதனால் பந்து வரும் திசையை நோக்கி பேட்டை நேராகக் கொண்டுவர முடிகிறது."
"ஷாட்களைத் தேர்வு செய்யும் விதத்திலும் மாற்றம் ஏற்பட்டுள்ளது. முன்பு ஆஃப் ஸ்டம்புக்கு வெளியே செல்லும் பந்துகளைக் கூட அடிக்க முயற்சி செய்வார். இப்போது அத்தகைய பந்துகளை அடிக்காமல் விட்டுவிடுவதே சிறந்தது என்று கருதுகிறார்."
"ராகுலின் ஆட்டத்தில் ஏற்பட்டுள்ள மாற்றம் தெளிவாகத் தெரிகிறது. முன்பு அவர் அவசரப்படுபவராகத் தோன்றினார். ஆனால், அனுபவத்தின் மூலம் அந்தப் போக்கைக் கட்டுப்படுத்தியுள்ளார்" என்றார் சஞ்சய் கிஷோர்.
கடந்த ஆறு அல்லது ஏழு மாதங்களாகவே இதற்கான தயாரிப்புகளில் ராகுல் ஈடுபட்டு வந்துள்ளார்.
இந்த சதத்தின் மூலம், பாகிஸ்தானின் சயீத் அன்வருக்குப் பிறகு நான்கு நாடுகளிலும் டெஸ்ட் சதமடித்த இரண்டாவது ஆசிய தொடக்க ஆட்டக்காரர் என்ற பெருமையையும் ராகுல் பெற்றார்.
போட்டிக்குப் பிறகு பேசிய ராகுல், கடந்த ஆறு முதல் ஏழு மாதங்களாகவே நியூசிலாந்தில் டெஸ்ட் போட்டியில் விளையாடுவது குறித்து யோசித்து வந்ததாகக் கூறினார்.
"நீண்ட காலமாக டெஸ்ட் கிரிக்கெட் விளையாடி, உங்கள் கிரிக்கெட் வாழ்க்கையின் பிற்பகுதியை எட்டும்போது, வெவ்வேறு நாடுகளில் உங்களை நீங்களே சோதித்துப் பார்க்கும் வாய்ப்பைப் பெற விரும்புவீர்கள். உலகின் சிறந்த பந்துவீச்சுத் தாக்குதல்களை எதிர்கொள்ள வேண்டும் என்று நினைப்பீர்கள்."
"நியூசிலாந்து என்பது பல பேட்டர்களால் எளிதில் ரன்கள் எடுக்க முடியாத நாடு. இங்குள்ள சூழலும் அவ்வளவு சாதகமானது அல்ல. அதனால்தான் இங்கு டெஸ்ட் போட்டியில் விளையாட விரும்பினேன்."
"அந்த வாய்ப்பு கிடைத்தபோது, அதை முழுமையாகப் பயன்படுத்திக் கொள்ள வேண்டும் என்று நினைத்தேன். அதற்காக முன்கூட்டியே இங்கு வர முடிவெடுத்தேன். இதன்மூலம் போட்டிக்குத் தயாராகப் போதிய நேரம் கிடைக்கும் என்று கருதினேன்" என்றார் ராகுல்.
"ஒரு கட்டத்தில் ராகுலின் தன்னம்பிக்கை குறைந்தது. அப்போது அவரது ஆட்டத்தில் சில குறைபாடுகளும் வெளிப்படையாகத் தெரிந்தன. ஆனால், பின்னர் அவற்றில் கவனம் செலுத்தி முன்னேற்றம் கண்டார்" என்று விளையாட்டுச் செய்தியாளர் நீரு பாட்டியா மதிப்பிட்டார்.
"ராகுல் தனது ஆட்டத்தில் பெரிய அளவில் எந்த மாற்றத்தையும் செய்யவில்லை. முன்பைவிட இப்போது நேர்மறையான மனநிலையுடன் விளையாடுவதும், அதிக பொறுமையைக் கடைப்பிடிப்பதும்தான் உண்மையான வித்தியாசம்" என்றார் அவர்.
மூத்த விளையாட்டு செய்தியாளர் சஞ்சய் கிஷோர் கூறுகையில், தற்போதைய இந்திய அணியில் அதிக அனுபவம் வாய்ந்த வீரர்களில் ராகுலும் ஒருவர் என்றார்.
அவர் கேப்டனாக இல்லாவிட்டாலும், அணியை வழிநடத்தும் பொறுப்பு அவருக்கு உள்ளது. அணியில் உள்ள மூத்த வீரர்களுக்கு இருக்கும் தன்னம்பிக்கை மற்ற வீரர்களிடமும் தாக்கத்தை ஏற்படுத்தும்.
"ராகுல் தானும் நிதானத்தைக் கடைப்பிடிக்கிறார். மற்ற பேட்டர்களும் சுதந்திரமாக விளையாடுவதற்கான வாய்ப்பை வழங்குகிறார்" என்றார் அவர்.
யஷஸ்வி ஜெய்ஸ்வால் – ராகுல் தொடக்க ஜோடி குறித்துப் பேசிய சஞ்சய் கிஷோர், இதனை சச்சின் – சேவாக் அல்லது கம்பீர் கூட்டணியுடன் ஒப்பிடுவது சரியாக இருக்காது என்றார்.
இருப்பினும், இந்தக் கூட்டணி நீண்ட காலம் இணைந்து விளையாட முடியும். அடுத்த நான்கு முதல் ஐந்து ஆண்டுகளில் தனக்கென ஒரு தனித்துவமான அடையாளத்தை உருவாக்கவும் வாய்ப்புள்ளது.
நீண்ட காலத்துக்குப் பிறகு இந்திய அணிக்கு வலுவான தொடக்க ஆட்டக்காரர்கள் கூட்டணி கிடைத்துள்ளது. விரேந்தர் சேவாக் – கவுதம் கம்பீர் கூட்டணிக்குப் பிறகு, யஷஸ்வி ஜெய்ஸ்வால் – கே.எல்.ராகுல் வடிவில் இந்திய அணிக்கு வலுவான தொடக்க ஜோடிஅமைந்துள்ளதாக நீரு பாட்டியா கூறினார்.
ஐபிஎல் தொடரில் ராகுலின் எதிர்காலம் என்ன?
டி20 கிரிக்கெட் குறித்துப் பேசிய சஞ்சய் கிஷோர், எதிர்காலத்தில் வீரர்களைத் தேர்வு செய்வதில் ஐபிஎல் தொடரில் அவர்களின் செயல்பாடுகள் முக்கியப் பங்கு வகிக்கும் என்றார்.
ஐபிஎல் தொடரில் டெல்லி அணி ஒரு கேப்டனைத் தேடி வருவதாகவும் அவர் குறிப்பிட்டார். கே.எல்.ராகுலை அணியிலிருந்து விடுவித்த லக்னௌ அணி, தற்போது அதற்காக வருத்தப்படக் கூடும் என்றும் அவர் கருத்துத் தெரிவித்தார்.
எதிர்வரும் ஐபிஎல் சீசன் ராகுலின் கிரிக்கெட் வாழ்க்கையில் முக்கியமானதாக அமையலாம்.
இந்திய டி20 அணிக்கு கே.எல்.ராகுல் மீண்டும் திரும்புவதற்கான வாய்ப்பு தற்போது சற்று கடினமாகவே தெரிகிறது.
- இது, பிபிசிக்காக கலெக்டிவ் நியூஸ்ரூம் வெளியீடு