அமெரிக்க அதிபர் டொனால்ட் டிரம்ப், ஆசிய-பசிபிக் பொருளாதார ஒத்துழைப்பு உச்சிமாநாட்டில் பங்கேற்பதற்காக சீனாவின் தெற்கு நகரமான ஷென்சென் வந்தடைந்தபோது, அவரை நேரில் வரவேற்பதற்காக சீன அதிபர் ஷி ஜின்பிங் விமான நிலையத்திற்கே வருகை தந்திருந்தார்.
ஆனால், ரஷ்ய அதிபர் விளாடிமிர் புதின் சீனாவிற்கு வந்தபோது, அவரை வரவேற்கும் பொறுப்பு ஷி ஜின்பிங்கின் தலைமை அதிகாரியும், சீன கம்யூனிஸ்ட் கட்சியின் மூத்த தலைவருமான சாய் கி வசம் ஒப்படைக்கப்பட்டிருந்தது.
ஹாங்காங்கைத் தளமாகக் கொண்டு செயல்படும் முன்னணி நாளிதழான செளத் சைனா மார்னிங் போஸ்ட் வெளியிட்ட செய்தியில், சீனாவின் அரசுத் தலைவர் ஒருவர் வெளிநாட்டுத் தலைவரை வரவேற்பதற்காக விமான நிலையத்திற்கு நேரில் சென்ற நிகழ்வு கடைசியாக 1959ஆம் ஆண்டில்தான் நடைபெற்றது என்று குறிப்பிட்டிருந்தது.
அப்போது, சீன தலைவர் மாவோ சேதுங், சோவியத் ஒன்றியத்தின் தலைவர் நிகிதா குருஷேவை வரவேற்பதற்காக பெய்ஜிங் விமான நிலையத்திற்குச் சென்றிருந்தார். குருஷேவின் அந்தப் பயணம் ரகசியமாக வைக்கப்பட்டிருந்ததுடன், அக்கால கட்டத்தில் இரு நாடுகளுக்கும் இடையே ஆழமான மூலோபாய அவநம்பிக்கையும் நிலவியது.
ஆனால், இம்முறை நிலைமை முற்றிலும் மாறுபட்டிருந்தது. 'ஏர் ஃபோர்ஸ் ஒன்' விமானத்திலிருந்து டிரம்ப் கீழே இறங்கியதும், உலகின் மிக வலிமையான இரு நாடுகளின் தலைவர்களும் கேமராக்களுக்கு முன்னிலையில் ஒருவரையொருவர் ஆரத்தழுவி வரவேற்றனர். ஜின்பிங் இவ்வாறு வெளிப்படையாக அன்பையும் நெருக்கத்தையும் வெளிப்படுத்துவது மிகவும் அரிதான நிகழ்வாகும் என்று அந்தச் செய்தி சுட்டிக்காட்டியது.
இதற்கிடையில், சீன விமானப்படையைச் சேர்ந்த 'ஆகஸ்ட் 1' வான் சாகசக் குழுவின் ஐந்து ஜே-10C ரகப் போர் விமானங்கள், வண்ணப் புகைக் கோலமிட்டபடி விமான நிலையத்தின் வான்வெளியில் அணிவகுத்துப் பறந்தன.
டிரம்பிற்கு அளிக்கப்பட்ட இந்த அரிய வரவேற்பும், சிறப்பு ராணுவ வான் சாகச நிகழ்ச்சியும் வெறும் சம்பிரதாய நிகழ்வுகளாக அமையவில்லை. அமெரிக்காவுடனான உறவில் பரஸ்பர மரியாதை, ராஜதந்திர நெருக்கம் மற்றும் சமத்துவம் ஆகியவற்றுக்கு சீனா அளிக்கும் முக்கியத்துவத்தை உலகிற்கு வெளிப்படுத்தும் வகையில் இவை அமைந்திருந்தன.
புதினை விட டிரம்பிற்கு ஜின்பிங் அதிக முக்கியத்துவம் அளித்தாரா?
ஜின்பிங் தனது 'பழைய நண்பர்' புதினை விட, புதிய நண்பர் டிரம்பிற்கு அதிக முக்கியத்துவம் அளிக்கிறாரா என்பதுதான் இங்கு எழும் கேள்வி.
யுக்ரேன் உள்துறை அமைச்சகத்தின் முன்னாள் ஆலோசகரான ஆன்டன் கெராஷ்சென்கோ, இரு வரவேற்பு நிகழ்வுகளையும் ஒப்பிட்டு சமூக வலைதளத்தில் ஒரு பதிவை வெளியிட்டுள்ளார். அதில், ஒரு புகைப்படத்தில் ஷி ஜின்பிங்கும் டிரம்பும் விமான நிலையத்தில் ஒருவரையொருவர் ஆரத்தழுவி வரவேற்கும் காட்சியும், மற்றொரு புகைப்படத்தில் புதினை வரவேற்பதற்காக சீனாவின் மூத்த அதிகாரி ஒருவர் காத்திருக்கும் காட்சியும் இடம்பெற்றிருந்தன. இதனைச் சுட்டிக்காட்டிய கெராஷ்சென்கோ, "சீனாவில் புதின் பகிரங்கமாக அவமானப்படுத்தப்பட்டார்" என்று விமர்சித்திருந்தார்.
அவர் மேலும் கூறுகையில், "ரஷ்ய அதிபர் புதினை, சீன கம்யூனிஸ்ட் கட்சியின் மத்தியக் குழுவின் பொது அலுவலகத் தலைவரான சாய் கி வரவேற்றார். புதினை விட சாய் கி சுமார் 20 சென்டிமீட்டர் உயரமானவர். அவருக்கு அருகில் புதின் நின்றிருந்த காட்சி, ரஷ்யா சீனாவுக்கு கீழான நிலையில் இருப்பதைப் போன்ற தோற்றத்தை ஏற்படுத்தியது. சீனாவின் அணுகுமுறை, புதினுக்கு அவரது இடத்தை உணர்த்துவதாகவே அமைந்திருந்தது" என்று குறிப்பிட்டார்.
"அமெரிக்க அதிபர் டொனால்ட் டிரம்ப், ஏபெக் உச்சிமாநாட்டில் பங்கேற்பதற்காக ஷென்சென் வந்தடைந்தபோது, சீன அதிபர் ஜின்பிங் நேரில் சென்று அவரை வரவேற்றார். சீனாவின் கூட்டாளியாகக் கருதப்படும் ரஷ்ய அதிபர் புதினுக்கு அளிக்கப்பட்ட வரவேற்புடன் ஒப்பிடுகையில், டிரம்பிற்கு வழங்கப்பட்ட வரவேற்பு மிகுந்த முக்கியத்துவம் வாய்ந்ததாக இருந்தது. சீனாவுடனான உறவில் ரஷ்யா சமமான கூட்டாளியாக இல்லாமல், சார்புநிலை கொண்ட கூட்டாளியாகவே இருக்கிறது என்பதை பெய்ஜிங் இதன் மூலம் வெளிப்படுத்தியுள்ளது. ரஷ்ய அரசின் பிரசார அமைப்புகளும் ஊடகங்களும் இந்த வரவேற்பு நிகழ்வின் காட்சிகளைப் பெரிதாக வெளியிடாமல் தவிர்த்து, புதினின் விமானம் தரையிறங்கிய காட்சிகளை மட்டுமே ஒளிபரப்பின" என்றும் கெராஷ்சென்கோ தனது பதிவில் தெரிவித்துள்ளார்.
டிரம்பிற்கு ஷி ஜின்பிங் அளித்த இந்தச் சிறப்பான வரவேற்பு, அமெரிக்காவுடனான உறவைக் கையாள்வதில் பெய்ஜிங் காட்டும் ராஜதந்திர முக்கியத்துவத்தையும், இருதரப்பு உறவுகளை மேம்படுத்துவதில் அது கொண்டுள்ள ஆர்வத்தையும் வெளிப்படுத்துவதாக அமைந்துள்ளது.
இருப்பினும், கெராஷ்சென்கோவின் கருத்தை பெரும்பாலான அரசியல் ஆய்வாளர்கள் ஏற்றுக்கொள்ளவில்லை. இரு தலைவர்களுக்கும் அளிக்கப்பட்ட வரவேற்பை மட்டும் அடிப்படையாகக் கொண்டு சீனா தனது கூட்டாளிகளுக்கு அளிக்கும் முக்கியத்துவத்தைத் தீர்மானிக்க முடியாது என்பதே அவர்களின் பார்வையாக உள்ளது.
தி வால் ஸ்ட்ரீட் ஜர்னல் இதழின் ரஷ்யப் பிரிவுத் தலைவரான தாமஸ் குரோவ் தனது ஆய்வில், "அமெரிக்காவின் முதன்மையான மூலோபாயப் போட்டியாளராக சீனா விளங்குகிறது. அதன் பொருளாதாரம் ரஷ்யாவை விட பல மடங்கு பெரியது. யுக்ரேன் மீதான ரஷ்யாவின் படையெடுப்பைத் தொடர்ந்து, பொருளாதார ஆதரவு மற்றும் வர்த்தக உறவுகள் வாயிலாக மாஸ்கோவிற்கு சீனா முக்கியமான ஆதரவுத் தளமாக இருந்து வருகிறது. இருப்பினும், இந்தச் சந்திப்பு ஒரு முக்கியமான விஷயத்தைத் தெளிவுபடுத்தியுள்ளது. அதாவது, பெய்ஜிங் தனது சொந்த தேசிய நலன்களுக்கும் முன்னுரிமைகளுக்கும் ஏற்பவே ராஜதந்திர முடிவுகளை எடுக்கிறது. புதினின் விருப்பங்களுக்கும் ராஜதந்திர நிகழ்ச்சி நிரலுக்கும் அது தன்னை முழுமையாக உட்படுத்திக் கொள்வதில்லை" என்று அவர் குறிப்பிட்டுள்ளார்.
"இந்த உச்சிமாநாட்டின் மூலம் புதின் எந்தவொரு குறிப்பிடத்தக்க கொள்கை மாற்றத்தையும் சாதிக்கவில்லை என்றாலும், இந்தச் சந்திப்பின் அரசியல் முக்கியத்துவத்தைப் புறக்கணிக்க முடியாது. ரஷ்யாவிற்குள் இந்த நிகழ்வு பெரிதும் முன்னிலைப்படுத்தப்பட்டதுடன், அந்நாட்டு ஊடகங்களிலும் விரிவான கவனம் பெற்றது. இந்தச் சந்திப்பு புதினுக்கு ஒரு முக்கியமான அரசியல் வாய்ப்பை வழங்கியது. அதாவது, யுக்ரேன் போர் மற்றும் மேற்கத்திய நாடுகளின் அழுத்தங்களுக்கு மத்தியில் ரஷ்யா எதிர்கொள்ளும் சவால்களுக்கிடையிலும், சர்வதேச ராஜதந்திர அரங்கில் தன்னால் தொடர்ந்து முக்கியப் பங்காற்ற முடியும் என்பதை வெளிப்படுத்த அவருக்கு இது உதவியது.
டிரம்ப் மற்றும் ஜின்பிங்குடன் புதின் இடம்பெற்ற காட்சிகளும், குறிப்பாக டிரம்ப் ரஷ்ய அதிபரை ஆரத்தழுவி வரவேற்ற நிகழ்வும், கிரெம்ளினுக்கு முக்கியமான அரசியல் அடையாளங்களாக அமைந்தன. உலக அரசியலில் ரஷ்யா தொடர்ந்து ஒரு முக்கிய சக்தியாகத் திகழ்கிறது என்ற செய்தியை உள்நாட்டிலும் சர்வதேச அளவிலும் வெளிப்படுத்த இந்தக் காட்சிகள் உதவின" என்று தாமஸ் குரோவ் தெரிவித்துள்ளார்.
நிபுணர்கள் சொல்வது என்ன?
அரசியல் ஆய்வாளரும், புதினின் முன்னாள் உரை எழுத்தாளருமான அப்பாஸ் கல்லியமோவ், 'தி வால் ஸ்ட்ரீட் ஜர்னல்' இதழிடம் கூறுகையில், "புதின் மீண்டும் முக்கியத்துவம் பெறுவதற்கும், இந்தச் சந்திப்பு நிகழ்வதற்கும் முழு முதற்காரணம் டிரம்ப் தான். உலகின் மிக வலிமை மிக்க நாட்டின் அதிபர், ஒருவரைச் சமமானவராக நடத்தும் போது, சர்வதேச அரங்கில் அவரைத் தனிமைப்படுத்தி வைத்திருப்பது கடினமாகிவிடுகிறது" என்று தெரிவித்தார்.
மேலும் அவர், "புதின் ஆட்சியில், ரஷ்யா படிப்படியாக சோவியத் ஒன்றியத்தைப் போன்ற நிலையை நோக்கிச் செல்கிறது. அது சில தந்திரோபாய வெற்றிகளைப் பெற்றாலும், அதன் நீண்டகால மூலோபாய வீழ்ச்சி தொடர்ந்து கொண்டேதான் இருக்கிறது" என்று குறிப்பிட்டார்.
இருப்பினும், ராஜதந்திர உறவுகளில் தோற்றங்களும் குறியீடுகளும் முக்கியத்துவம் வாய்ந்தவை என்றாலும், அவை எப்போதும் கொள்கையில் ஒரு பெரிய மாற்றத்தைக் குறிப்பதில்லை என்று சில ஆய்வாளர்கள் சுட்டிக்காட்டுகின்றனர்.
'யூரேஷியா குரூப்' அமைப்பின் மூத்த ஆய்வாளர் டொமினிக் சியூ, அமெரிக்க நாளிதழான 'தி பிலடெல்பியா என்கொயரர்' இதழிடம் கூறுகையில், "இந்த நிகழ்வுகளுக்கு அளவுக்கு அதிகமான முக்கியத்துவம் கொடுக்கக்கூடாது. அதேபோல், ரஷ்யாவைக் கைவிட்டுவிட்டு அமெரிக்காவை நோக்கி சீனா சாய்கிறது என்றும் முடிவு செய்யக்கூடாது. இந்த நுணுக்கமான அணுகுமுறை சீனாவின் ராஜதந்திர வியூகத்தின் ஒரு பகுதியாகும்" என்று கூறினார்.
டொமினிக் சியூவின் கருத்துப்படி, அதிபர் ஜி ஜின்பிங் நேரில் வந்து டிரம்பை வரவேற்றது, அமெரிக்காவுடன் ஒரு நிலையான உறவைப் பேண சீனா விரும்புவதைக் காட்டலாம். தனக்கு மிகுந்த மரியாதை அளிக்கப்பட வேண்டும் என்பதையும், பொதுவெளியில் தனது பிம்பம் நேர்மறையாக இருக்க வேண்டும் என்பதையும் டிரம்ப் விரும்புவார் என்பதை உணர்ந்தே, அவருக்கு ஏற்றவாறு இந்த வரவேற்பு அமைக்கப்பட்டிருக்கலாம்.
இது ஒரு பரஸ்பர நடவடிக்கையுமாகும்; கடந்த செப்டம்பர் மாதம், அமெரிக்காவின் 'ஜாயிண்ட் பேஸ் ஆண்ட்ரூஸ்' தளத்தில் ஜி ஜின்பிங்கை டிரம்ப் நேரில் வரவேற்றிருந்தார்.
சீனாவிற்கும் ரஷ்யாவிற்கும் இடையிலான கூட்டணி ஏற்கனவே நன்கு நிறுவப்பட்ட, மிகவும் வலுவான ஒன்று என்று அவர் குறிப்பிட்டார். ஜின்பிங்கும் புதினும் ஒருவரை ஒருவர் நன்கு அறிந்தவர்கள்; டிரம்புடன் அவர்கள் நடத்திய சந்திப்புகளை விட, தங்களுக்குள் அவர்கள் பல மடங்கு அதிகமாகச் சந்தித்துக் கொண்டிருக்கிறார்கள்.
இது குறித்து சியூ கூறுகையில், "ஜின்பிங்கிற்கும் புதினுக்கும் இடையே ஒரு புரிதல் இருக்கலாம்—அதாவது, டிரம்புடனான உறவைக் கையாளும் போது இருவரும் மிகுந்த கவனத்துடன் செயல்பட வேண்டும். இதற்காக, தங்களுக்குள் சந்திக்கும் போது அவர்கள் சற்று குறைவான முறையான வரவேற்பை ஏற்றுக் கொண்டாலும் ஆச்சரியப்படுவதற்கில்லை" என்று தெரிவித்தார்.
'ஸ்டிம்சன் சென்டர்' அமைப்பின் சீனத் திட்ட இயக்குநர் யுன் சன், வரவேற்பு முறைகளில் உள்ள இந்த வேறுபாடு, சீனா-ரஷ்யா உறவில் எந்தவித எதிர்மறையான தாக்கத்தையும் ஏற்படுத்தாது என கருதுகிறார்.
"சீனாவிற்கு அமெரிக்காவும் ரஷ்யாவும் தேவைப்படுகின்றன, ஆனால் வெவ்வேறு காரணங்களுக்காக அவை தேவைப்படுகின்றன" என்று அவர் கூறினார். "அமெரிக்காவுடனான உறவை மிகவும் கவனமாகக் கையாள வேண்டியுள்ளது; அதே சமயம் ரஷ்யா, சீனாவுக்கு ஒரு பங்காளியாக உள்ளது. இவை இரண்டையும் ஒப்பிடுவது, முற்றிலும் மாறுபட்ட இரு விஷயங்களை ஒப்பிடுவதற்குச் சமம்."
புரூக்கிங்ஸ் நிறுவனத்தின் மூத்த ஆய்வாளர் ரையன் ஹாஸ், ஏ.எஃப்.பி செய்தி நிறுவனத்திடம் கூறுகையில், "இந்த நிகழ்வு முழுவதிலும் ஜின்பிங் தன்னை மையப்புள்ளியாக முன்னிறுத்திக் கொண்டார். பெரும் வல்லரசுகளுக்கு இடையே அவர் ஒரு தீர்க்கமான பங்கை வகித்ததுடன், இந்தச் சந்திப்பை ஒருங்கிணைப்பவராகவும் செயல்பட்டார். இந்த நிகழ்வின் காட்சிகள், ஷி ஜின்பிங்கின் அரசியல் செல்வாக்கை மேலும் வலுப்படுத்தும். அமெரிக்காவுடன் தற்போது நிலவும் மென்மையான அமைதியையும் நிலைத்தன்மையையும் பேணிக் காப்பதே பெய்ஜிங்கின் முதன்மை நோக்கம்; எனவே, டிரம்புக்கு மரியாதை செலுத்துவதற்கான வழிகளை ஷி ஜின்பிங் தேடுவார்," என்று தெரிவித்தார்.
பெரும் வல்லரசுகளுக்கு இடையே ஒரு முக்கியத் தலைவராக, பல்வேறு தரப்பினரை ஒன்றிணைத்த முதன்மை நபராக ஷி ஜின்பிங் தன்னை வெளிப்படுத்திக் கொண்டார் என்றும் அவர் குறிப்பிட்டார்.
இந்தச் சந்திப்பைத் தொடர்ந்து மூன்று நாடுகளும் இணைந்து வெளியிட்ட 'அமைதிப் பிரகடனத்தில்', ஐக்கிய நாடுகள் சபை போன்ற பன்னாட்டு அமைப்புகளில் சீர்திருத்தங்களைக் கொண்டுவர வேண்டும் என்ற சீனாவின் நீண்டகாலக் கோரிக்கைகள் உட்பட, சீனாவின் பல நிலைப்பாடுகள் இடம்பெற்றிருந்தன.
சீனாவின் ரென்மின் பல்கலைக்கழகத்தின் சர்வதேச விவகாரங்கள் நிறுவனத்தின் இயக்குநர் வாங் யிவெய் கூறுகையில், "மூலோபாய ஒருமித்த கருத்தை எட்டுவதன் மூலம், இந்த நாடுகள் பரந்த அளவிலான பன்னாட்டு ஒத்துழைப்பை ஊக்குவிக்க முடியும். உலக ஒழுங்கமைப்பையும் அதன் அடிப்படை விழுமியங்களையும் மறுவரையறை செய்வதற்கான திசையை வடிவமைப்பதில் இவை பங்களிக்க முடியும்" என்று தெரிவித்தார்.
குழு புகைப்படத்தின் போது புதின் புறக்கணிக்கப்பட்டாரா?
புதன்கிழமை இரவு நடைபெற்ற வரவேற்பு நிகழ்ச்சிக்கு முன்னதாக, மூன்று நாட்டுத் தலைவர்களும் குழுப் புகைப்படத்திற்காக ஒவ்வொருவராக நிகழ்விடத்திற்கு வந்தடைந்தனர். பெரிய மண்டபத்தின் வழியாக நடந்து வந்த அவர்கள், சீன அதிபர் ஷி ஜின்பிங்கை சந்தித்தனர்.
ஷி ஜின்பிங் மெல்லிய புன்னகையுடன் ஒவ்வொரு தலைவரையும் வரவேற்று கைகுலுக்கினார். அவரது முகத்தில் பெரிய அளவிலான உணர்ச்சி மாற்றங்கள் ஏதுமின்றி, வழக்கமான நிதானத்துடன் காணப்பட்டார்..
ஆனால், டிரம்புடனான அவரது சந்திப்பு மற்றொரு வகையில் அமைந்திருந்தது. இருவரும் கைகுலுக்கிய பிறகு, டிரம்ப் அங்கேயே சிறிது நேரம் நின்று, ஷி ஜின்பிங்குடன் இணைந்து புகைப்படங்கள் எடுத்துக் கொண்டார். இருவரும் கேமராக்களுக்கு முன்னால் கூடுதல் நேரம் செலவிட்டனர்.
இதற்கு மாறாக, புதினுடனான சந்திப்பு மிகக் குறுகிய நேரத்திலேயே முடிவடைந்தது. அவரை மெல்லிய புன்னகையுடன் வரவேற்ற ஷி ஜின்பிங், இருவரும் கேமராக்களை நோக்கித் திரும்பிப் புகைப்படங்களுக்கு முகம் கொடுத்ததும் அடுத்த நிகழ்வுக்குச் சென்றார்.
குழுப் புகைப்படம் எடுப்பதற்குச் சற்று முன்பாக, புதின் டிரம்புடன் உரையாட முயன்றார். ஆனால், தனது கருத்தை முழுமையாகத் தெரிவிப்பதற்கு முன்பே அந்த உரையாடல் முடிவுக்கு வந்தது. பின்னர், டிரம்பும் ஷி ஜின்பிங்கும் புதின் நிற்க வேண்டிய இடத்தைச் சைகை மூலம் சுட்டிக்காட்டினர். அந்த இரு தலைவர்களுக்கும் இடையில் ஜின்பிங்கின் மனைவி நின்றிருந்தார்.
இதனைத் தொடர்ந்து, அதிகாரப்பூர்வ விருந்தினர்களுக்கு விருந்தளிப்பதற்காக ஒதுக்கப்பட்டிருந்த வில்லா ஒன்றின் அறையில், மூன்று தலைவர்களும் வட்ட மேசையைச் சுற்றி அமர்ந்து பேச்சுவார்த்தை நடத்தினர். ஷி ஜின்பிங்கின் இடதுபுறத்தில் டிரம்பும், வலதுபுறத்தில் புதினும் அமர்ந்திருந்தனர்.
அப்போது பேசிய ஷி ஜின்பிங், "ஷென்செனில் அதிபர் புதின் மற்றும் அதிபர் டிரம்ப் ஆகியோருடன் இந்த முத்தரப்புச் சந்திப்பை நடத்துவதில் நான் மகிழ்ச்சியடைகிறேன்" என்று தெரிவித்தார்.
சீனத் தரப்பு வெளியிட்ட தகவலின்படி, ஐக்கிய நாடுகள் சபையில் சீர்திருத்தங்களை முன்னெடுப்பதற்கு மூன்று நாட்டுத் தலைவர்களும் ஆதரவு தெரிவித்தனர். இந்த மூன்று நாடுகளும் ஐநா பாதுகாப்பு கவுன்சிலின் நிரந்தர உறுப்பினர்கள் என்பது குறிப்பிடத்தக்கது.
எரிபொருள் விநியோகத்தை அதிகரிப்பது, அணு ஆயுதங்களால் ஏற்படக்கூடிய அபாயங்களைக் குறைப்பது உள்ளிட்ட விவகாரங்கள் குறித்த பேச்சுவார்த்தைகளைத் தொடர்ந்து முன்னெடுக்கவும் அவர்கள் ஒப்புக்கொண்டனர்.
அமெரிக்காவின் முன்னணி நாளிதழான தி நியூயார்க் டைம்ஸ் தனது செய்தியில், ரஷ்யாவை மீண்டும் உலகின் முக்கிய வல்லரசுகளின் வரிசையில் இடம்பெறச் செய்வதற்கான முயற்சிகளில் டிரம்ப் தொடர்ந்து ஈடுபட்டு வருவதாகக் குறிப்பிட்டது. புதினைத் தனது நண்பர் என்று வர்ணித்த டிரம்ப், யுக்ரேன் போர் விரைவில் முடிவுக்கு வர வேண்டும் என்பதில் மூன்று நாட்டுத் தலைவர்களும் விருப்பம் கொண்டுள்ளதாக வலியுறுத்தினார்.
இருப்பினும், இந்தச் சந்திப்புக்குப் பிறகும் யுக்ரேனுடன் பேச்சுவார்த்தை நடத்தும் எண்ணம் இல்லை என்பதை ரஷ்ய அதிபர் புதின் மீண்டும் உறுதிப்படுத்தினார்.
"இரண்டாம் உலகப் போரில் வெற்றி பெற்ற நாடுகள் என்ற அடிப்படையில் மட்டுமல்லாமல், சர்வதேச அமைதியையும் பாதுகாப்பையும் பேணுவதில் பொதுவான பொறுப்பைக் கொண்டுள்ள நாடுகள் என்ற வகையிலும் நமது மூன்று நாடுகளும் ஒன்றிணைந்துள்ளன" என்று தனது உரையில் புதின் தெரிவித்தார்.
- இது, பிபிசிக்காக கலெக்டிவ் நியூஸ்ரூம் வெளியீடு