உலகைச் சுற்றும் பயணத்தில் ஈடுபட்ட சொகுசுக் கப்பல் ஒன்று சிங்கப்பூரில் முடக்கப்பட்டது. அமெரிக்காவைச் சேர்ந்த அந்த நிறுவனத்திடம் பணம் தீர்ந்துபோனதால், பயணிகள் கம்போடியாவில் தவிக்கும் நிலை ஏற்பட்டிருந்தது.

தி ஒடிஸி என்ற அந்தக் கப்பல், 2024 அக்டோபரில் பெல்ஃபாஸ்டில் இருந்து தனது பயணத்தைத் தொடங்கியது. பல ஆண்டுகள் நீடிக்கும் உலகச் சுற்றுப்பயணமாக இது திட்டமிடப்பட்டிருந்தது. தற்போது அந்தக் கப்பல் சிங்கப்பூர் துறைமுகப் பகுதியில் நிறுத்தப்பட்டுள்ளதாக அந்நாட்டு அதிகாரிகள் தெரிவித்துள்ளனர்.

எரிபொருள் செலவு வழக்கத்திற்கு மாறாக அதிகரித்துள்ளதாகக் கூறி, கப்பலின் உரிமையாளரான வில்லா வீ ரெசிடென்சஸ் நிறுவனம் திடீரென தனது செயல்பாடுகளை நிறுத்தியது. இதையடுத்து, கடந்த மாதம் கம்போடியாவின் சிஹானுக்வில் துறைமுக நகரில் சுமார் 200 பயணிகள் கப்பலில் இருந்து இறங்க வேண்டிய கட்டாயம் ஏற்பட்டது.

கப்பலில் உள்ள பணியாளர்கள் நலமாக இருப்பதாக சிங்கப்பூர் துறைமுக ஆணையம் தெரிவித்துள்ளது.

''அவர்களின் நலன் மற்றும் பராமரிப்புக்கான ஏற்பாடுகளை கப்பலின் கடன் வழங்குநர்கள் கவனித்து வருவதாக'' சிங்கப்பூர் துறைமுக ஆணையம் தெரிவித்துள்ளது.

மேலும், நீதிமன்ற உத்தரவின்படி அந்தக் கப்பல் முடக்கப்பட்டதாகவும் கூறியுள்ளது.

சிங்கப்பூரைச் சேர்ந்த 'ஹெல்ம்ஸ்மேன் எல்எல்சி' என்ற சட்ட நிறுவனம், கப்பலை ''முடக்க கோரிய வழக்கறிஞராக'' குறிப்பிடப்பட்டுள்ளது. ஆனால், அது எந்தத் தரப்பின் சார்பாகச் செயல்படுகிறது என்பது தெளிவாகத் தெரியவில்லை.

தி ஒடிஸி கப்பல், மூன்றரை ஆண்டுகளில் 150 நாடுகளுக்குச் செல்லும் உலகச் சுற்றுப்பயணத்தை மேற்கொள்ளத் திட்டமிடப்பட்டிருந்தது.

பயணிகளுக்கு மூன்று வாய்ப்புகள் வழங்கப்பட்டிருந்தன. தங்கள் அறையை முழுமையாக விலைக்கு வாங்குவது (இதன் மூலம் முதல் பயணம் முடிந்த பிறகும் கப்பலில் தொடர்ந்து தங்கலாம்), ஐந்து ஆண்டு வசிப்பிடத்துக்குப் பணம் செலுத்துவது, அல்லது நாள் கணக்கில் நீடிக்கும் பயணங்களுக்காக அறையை வாடகைக்கு எடுப்பது

கப்பலில் நிரந்தரமாகத் தங்குவதற்கான அறைகளின் விலை 1.2 லட்சம் டாலர் முதல் 4.4 லட்சம் டாலர் வரை இருந்தது. இந்த அறைகளை மாதம் 3,500 டாலர் வாடகைக்கும் பெறலாம் என்று நிறுவனத்தின் இணையதளத்தில் குறிப்பிடப்பட்டிருந்தது.

"ஒரு காரின் விலைக்குச் சமமான தொகையில், உலகம் முழுவதும் பயணிக்கும் கப்பலில் உங்களுக்கான வீட்டைச் சொந்தமாக்கிக்கொள்ளலாம்" என்று அந்நிறுவனத்தின் நிறுவனர் மைக்கேல் பீட்டர்சன் முன்பு கூறியிருந்தார்.

ஆனால், இந்தக் கப்பல் பயணம் தொடங்கியதில் இருந்தே பல்வேறு சிக்கல்களைச் சந்தித்தது. பழுதுபார்ப்புப் பணிகள் மற்றும் ஆவணங்கள் தொடர்பான நடைமுறைகள் காரணமாக, கப்பல் புறப்படுவது நான்கு மாதங்கள் தாமதமானது.

வியட்நாமில் இருந்தபோது, உணவு விநியோக நிறுவனத்துக்குப் பணம் செலுத்தாததால், அந்த நிறுவனம் உணவு வழங்க மறுத்ததாகக் கூறப்படுகிறது. இதையடுத்து, கப்பல் பணியாளர்கள் உள்ளூர் மளிகைக் கடைகளில் உணவுப் பொருட்களை வாங்கியதாக அமெரிக்காவில் பிபிசியின் செய்தி கூட்டு நிறுவனமான சிபிஎஸ் நியூஸ் தெரிவித்துள்ளது.

மேலும், கடந்த ஆகஸ்ட் மாதம் கப்பல் சிங்கப்பூருக்கு வந்திருந்தபோது, தனது நிதி நெருக்கடி குறித்து பயணிகளிடம் நிறுவனம் எச்சரித்ததாகவும் சிபிஎஸ் செய்தி வெளியிட்டது. கப்பல் பயணத்தைத் தொடர்ந்து நடத்துவதற்காகப் பயணிகளிடமிருந்தே நிறுவனம் நிதி திரட்ட வேண்டியிருந்தது. அப்போது, கப்பல் முடக்கப்படுவதற்கான அபாயம் குறித்தும் பயணிகளிடம் தெரிவிக்கப்பட்டிருந்தது.

எரிபொருள் விலை தொடர்ந்து அதிகரித்ததால், கூடுதல் கட்டணம் செலுத்துவது குறித்து பயணிகளிடம் ஆலோசிக்குமாறு நிறுவனம் கேட்டுக்கொண்டதாகவும், பயணத் திட்டம் பெருமளவு குறைக்கப்பட்டதாகவும் அந்தக் கப்பலில் பயணம் செய்த ஹோலி ஹென்னஸி முன்பு பிபிசியிடம் தெரிவித்திருந்தார்.

கம்போடியாவில் கப்பல் பயணம் திடீரென முடிவுக்கு வந்த சில வாரங்களுக்குப் பிறகு, இந்த மாதத் தொடக்கத்தில் தி ஒடிஸி மீண்டும் சிங்கப்பூருக்குச் சென்றது.

இந்த ஆண்டின் தொடக்கத்தில் இரான் போர் காரணமாக எரிபொருள் விலை கடுமையாக உயர்ந்தது. இதனால், ஆசியாவின் சில பகுதிகளில் ஒரு கப்பல் அறைக்கான மாதாந்திர எரிபொருள் செலவு 1,800 டாலரிலிருந்து 8,000 டாலர் வரை அதிகரித்ததாக வில்லா வீ ரெசிடென்சஸ் நிறுவனம் அக்டோபர் 27-ஆம் தேதி வெளியிட்ட அறிக்கையில் தெரிவித்தது.

எரிபொருள் பயன்பாட்டைக் குறைக்க "குறிப்பிடத்தக்க நடவடிக்கைகளை" எடுத்ததாகவும், ஆனால் "அசாதாரண எரிபொருள் செலவு உயர்வை" ஈடுசெய்ய அவை போதுமானதாக இல்லை என்றும் நிறுவனம் கூறியது.

கம்போடியாவில் இருந்த காலத்தில் பயணிகளுக்கு மாற்றுத் தங்குமிட வசதிகளை ஏற்படுத்தித் தருவது குறித்து அவர்களுடன் இணைந்து செயல்பட்டதாகவும் நிறுவனம் தெரிவித்தது.

- இது, பிபிசிக்காக கலெக்டிவ் நியூஸ்ரூம் வெளியீடு