சமீபத்தில் சர்வதேச நீரிழிவு கூட்டமைப்பு உலகளவில் நீரிழிவு நோய் குறித்து முக்கியத் தரவுகளை வெளியிட்டது. அதன்படி, இந்தியாவில் 2024ஆம் ஆண்டு 3.86 கோடி பேர் தங்களுக்கு நீரிழிவு இருப்பதே தெரியாமல், பரிசோதனை செய்துகொள்ளாமல் இருந்துள்ளனர்.
இதில், முதல் பத்து நாடுகளில் சீனாவுக்கு அடுத்தபடியாக இரண்டாவது இடத்தில் இந்தியா உள்ளது. 20 வயதுக்கு உட்பட்ட குழந்தைகள், வளரிளம் நபர்களிடையே 3,01,000 பேருக்கு டைப் 1 நீரிழிவு நோய் உள்ளது.
இந்தத் தரவுகளை வைத்துப் பார்க்கையில் பல அறிகுறிகளை மக்கள் அலட்சியப்படுத்துவது அல்லது அச்சம் காரணமாக பரிசோதனை செய்துகொள்ளாமல் இருப்பதாக மருத்துவ நிபுணர்கள் கருதுகின்றனர்.
நீரிழிவு நோய் என்றாலே, அதிகமாக தாகம் எடுத்தல், அடிக்கடி சிறுநீர் கழித்தல், பசியெடுத்தல், உடல் எடை குறைதல் போன்ற பொதுவான அறிகுறிகளையே பலரும் அறிந்திருப்பார்கள். ஆனால், பலரும் கண்டுகொள்ளாத, ஆனால், நீரிழிவு நோயின் தீவிரத்தை உணர்த்தக் கூடிய பல அறிகுறிகள் இருப்பதாக மருத்துவர்கள் கூறுகின்றனர்.
"நீரிழிவு நோய் உள்ளவர்களில் 50% பேருக்கு பெரும்பாலும் அறிகுறிகளே இருக்காது. அதனால்தான் 6 மாதங்களுக்கு ஒருமுறை நிச்சயமாக அதற்கான பரிசோதனைகளைச் செய்துகொள்ள வேண்டும் என்கிறோம். எந்த அறிகுறிகளும் இல்லாமல்கூட சில நேரங்களில் சர்க்கரை அளவு 300-400 எனப் பரிசோதனை முடிவுகள் வரலாம். அறிகுறிகள் இருக்க வேண்டும் என்பது கட்டாயமல்ல" என்கிறார் நீரிழிவு மற்றும் நாளமில்லா சுரப்பியல் மருத்துவர் எஸ். ராஜ்குமார்.
1. கழுத்து உள்ளிட்ட பகுதிகள் கருப்பு நிறத்தில் காணப்படுதல்
இன்சுலின் எதிர்ப்புத் தன்மை (insulin resistance) காரணமாக, உடலின் மடிப்புப் பகுதிகளில் குறிப்பாக கழுத்துப் பகுதி கருப்பாக இருக்கும் என்கிறார் மருத்துவர் ராஜ்குமார். உடல் பருமன் காரணமாகவும் இது ஏற்படலாம். இந்த நிலைக்கு அகாந்தோசிஸ் நிக்ரிகன்ஸ் (Acanthosis nigricans) எனப் பெயர்.
இன்சுலின் என்பது கணையத்தால் சுரக்கப்படும் ஒரு ஹார்மோன். இது ரத்தத்தில் உள்ள சர்க்கரையை செல்கள் ஆற்றலாகப் பயன்படுத்த உதவுகிறது.
ரத்த ஓட்டத்தில் இன்சுலின் அளவு அதிகமாக இருக்கும்போது, சரும செல்கள் இயல்பைவிட வேகமாகப் பெருகுகின்றன. இதன் காரணமாக இந்தப் பாதிப்பு ஏற்படுகிறது.
"உடல் எடை அதிகமாக இருக்கும்போது இன்சுலின் சுரப்பு அதிகமாக இருக்கும். இதனால், கழுத்து உள்ளிட்ட மடிப்பு உள்ள பகுதிகளில் கருப்பாக இருக்கும். உடல் எடை அதிகமாக இருப்பவர்கள், ரத்த அழுத்தம், கொலஸ்டிரால், பிசிஓடி உள்ளவர்கள், உடல் உழைப்பு அதிகம் இல்லாதவர்கள், குடும்பத்தில் வேறு யாருக்கேனும் நீரிழிவு இருப்பவர்கள் உள்ளிட்டோர் நிச்சயம் நீரிழிவு நோய் உள்ளதா என்பதற்கான பரிசோதனையைச் செய்துகொள்ள வேண்டும்" என்கிறார் மருத்துவர் ராஜ்குமார்.
2. மூச்சில் பழ வாசனை வீசுதல்
"நீரிழிவு நோய் உள்ளவர்களுக்கு அதனால் தீவிர விளைவுகள் ஏற்படும்போது இந்தப் பிரச்னை ஏற்படும். உடலில் அதிகளவில் சர்க்கரை இருக்கும்போது உடலில் கீட்டோன் அமிலங்கள் உற்பத்தியாகும். அதில் ஒரு அமிலம்தான் பீட்டா ஹைட்ரோக்ஸிபியூட்ரிக். இதனால், ஒருவர் மூச்சுவிடும்போது பழ வாசனை ஏற்படும்" என்கிறார் மருத்துவர் ராஜ்குமார்.
நீரிழிவு கீட்டோஅசிடோசிஸ் என்பது நீரிழிவு நோயின் தீவிரமான சிக்கல்களில் ஒன்றாகக் கருதப்படுகிறது.
"உடலில் உள்ள ரத்த சர்க்கரையை ஆற்றலாகப் பயன்படுத்துவதற்காக, அது செல்களுக்குள் செல்ல உதவும் போதுமான இன்சுலின் இல்லாதபோது இந்த பாதிப்பு ஏற்படுகிறது. இதனால், உடல் ஆற்றலுக்காக கொழுப்பைச் சிதைக்கத் தொடங்குகிறது. இந்தச் செயல்முறையின்போது கீட்டோன்கள் எனப்படும் அமிலங்கள் உற்பத்தியாகின்றன.
கீட்டோன்கள் மிக வேகமாகவும் அதிக அளவிலும் உற்பத்தியாகும்போது, அவை உடலில் ஆபத்தான அளவுக்குச் சேர்ந்து கடுமையான பாதிப்புகளை ஏற்படுத்தலாம்" என எச்சரிக்கிறார் மருத்துவர் ராஜ்குமார்.
3. கை, கால்களில் வலி
"ரத்தத்தில் சர்க்கரையின் அளவு அதிகரிக்கும்போது கை, கால்களில் ஊசி குத்துவது போன்று வலி ஏற்படும் அல்லது உணர்ச்சியற்ற நிலை ஏற்படும். அதுவும் உடலில் சர்க்கரை அதிகமாக இருப்பதற்கான அறிகுறி. குறிப்பாக, இரவில் கை, கால்களில் உணர்ச்சியற்ற நிலை ஏற்படும் (paresthesia)" எனக் கூறுகிறார் மருத்துவர் ராஜ்குமார்.
ரத்தத்தில் சர்க்கரையின் அளவு அதிகமாக இருப்பதால் நரம்புகள் பாதிக்கப்படும்போது, அதை நீரிழிவு நரம்புப் பாதிப்பு என்கிறோம். இதனால் வலி அல்லது தசைப் பிடிப்பு போன்ற பாதிப்புகள் ஏற்படலாம். இந்த வலி கால்கள் அல்லது பாதங்களில் ஏற்படலாம். மேலும், கை, கால்கள் உள்ளிட்ட உடல் உறுப்புகளில் கூச்ச உணர்வு, எரிச்சல் அல்லது உணர்வின்மை போன்ற அறிகுறிகளும் தென்படலாம்.
எந்த வகையான நரம்புகள் பாதிக்கப்படுகின்றன என்பதைப் பொறுத்து இதன் அறிகுறிகள் மாறுபடும்.
4. பிறப்புறுப்பைச் சுற்றி புண், பூஞ்சை தொற்று ஏற்படுதல்
"இது, ஆண், பெண் என இருவருக்கும் தோன்றும். பிறப்புறுப்பில் பூஞ்சைத் தொற்று காரணமாக அப்பகுதியில் புண்கள் ஏற்பட வாய்ப்புண்டு. மேலும், ஆண்களுக்கு பலனோபோஸ்திடிஸ் எனும் நிலை ஏற்படலாம். அதாவது, ஆண்களின் பிறப்புறுப்பின் நுனியில் வெள்ளை திட்டுகள் ஏற்படும். பெண்களுக்கு பிறப்புறுப்பில் 'வெஜைனல் கேன்டிடியாசிஸ் எனும் பூஞ்சைத் தொற்று ஏற்படலாம்" என்கிறார் மருத்துவர் ராஜ்குமார்.
இவ்வாறு ஏற்படக்கூடிய சில தொற்றுகள்:
- பிறப்புறுப்புத் தொற்றுகள்
- ஈஸ்ட் தொற்றுகள்
- சிறுநீர்ப்பைத் தொற்றுகள்
- சருமத் தொற்றுகள்
ரத்தத்தில் சர்க்கரையின் அளவு அதிகமாக இருக்கும்போது, வெள்ளை ரத்த அணுக்கள் ரத்த ஓட்டத்தின் வழியாகச் செல்வதில் சிரமம் ஏற்படுகிறது. இதனால், நோய்த்தொற்றுகளை எதிர்த்துப் போராடும் உடலின் திறன் குறைகிறது.
5. வாய் வறண்டு போதல்
"வாய் முழுவதும் வறண்டு போதலும் நீரிழிவு நோயின் அறிகுறிதான் (Osmotic symptoms). நீரிழிவு நோய் உள்ளவர்களுக்கு நீர்ச்சத்து அதிகமாகக் குறைவதால், பாலிடிப்சியா (Polydipsia - அதிகப்படியான தாகம்) நிலை ஏற்படும்" என்கிறார் மருத்துவர் ராஜ்குமார்.
வாயில் உமிழ்நீர் சுரப்பது குறைவதால், பல் சொத்தை மற்றும் ஈறு நோய்கள் ஏற்படுவதற்கான வாய்ப்பு அதிகரிக்கிறது. வியப்புக்குரிய வகையில், நீரிழிவு நோய் கண்டறியப்பட்ட பிறகும் வாய் வறண்டுபோதல் தொடரக்கூடும். நீரிழிவு நோய்க்கு சிகிச்சையளிக்கப் பயன்படுத்தப்படும் சில மருந்துகளின் பக்கவிளைவாகவும் இது ஏற்படலாம்.
அதேபோன்று, "நீரிழிவு நோயின்போது குளுக்கோஸ் ஆற்றலாக மாறாததால் உடலில் குளுக்கோஸ் இல்லை எனக் கருதி உடல் பசியைத் தூண்டும். ஆனால், ஏற்கெனவே நிறைய சர்க்கரை உடலில் இருந்தாலும் அது ஆற்றலாக மாறாமல் இருக்கிறது. உடலில் ஆற்றல் குறைவாக இருக்கும் என்பதால் மயக்கம் ஏற்படலாம். அதே போன்று, உடலில் அசிட்டோன்கள் காரணமாக வாந்தியும் ஏற்படலாம்" என அவர் விவரிக்கிறார்.
6. பார்வைத் திறனில் மாற்றங்கள்
"கண்களின் லென்ஸ்களில் சர்க்கரை சார்பிட்டாலாக சேரும்போது பார்வைக் குறைபாடு ஏற்படும். இதனால், மங்கலான பார்வை ஏற்படலாம். சர்க்கரை அளவைக் கட்டுப்படுத்தும்போது இந்தப் பிரச்னை சீராகும்" என்கிறார் மருத்துவர் ராஜ்குமார்.
மேற்கூறிய அறிகுறிகள் தென்படத் தொடங்கும்போது நீரிழிவு பரிசோதனை செய்துகொள்ள வேண்டும் என அவர் எச்சரிக்கிறார். குறிப்பாக, உடல் பருமன் உள்ளவர்கள், குடும்பத்தில் ஏற்கெனவே நீரிழிவு நோய் உள்ளவர்கள் 30 வயதுக்கு மேல் 6 மாதங்களுக்கு ஒருமுறை பரிசோதனை செய்துகொள்ள வேண்டும் என்றும் மூன்று மாத சர்க்கரை அளவின் சராசரியைக் காட்டும் ஹெச்பிஏ1சி பரிசோதனையை மேற்கொள்ள வேண்டும் என்றும் மருத்துவர்கள் பரிந்துரைக்கின்றனர்.
- இது, பிபிசிக்காக கலெக்டிவ் நியூஸ்ரூம் வெளியீடு